07/12講道內容：上帝的團契

列位兄姊大家平安，今仔日非常歡喜，會當及大家作伙敬拜咱的上帝，亦感謝主賞賜此款的機會會當代表咱的公報社請安報告。感謝咱教會牧師、小會和眾會友會當接納我，佇遮代表總會及咱的教會說多謝。佇遮我嘛代表公報社社長方嵐亭牧師、公報社董事長劉柏超牧師及眾員工來請安及報告，久長以來，咱的教會對文字事工支持及參與，對咱教會文字傳道事工有很大的幫助，互咱教會報紙、教材、雜誌及福音文宣(耕心週刊)發展很好勢，這值得咱獻上感恩。

壹、本論

此時，咱來看今仔日所讀的經文，是記載咱救主耶穌基督怎樣醫治一個破病久久的人的故事。耶穌是怎樣幫助伊、協助伊，以及互伊有氣力閣爬起來、重新勇敢面對伊新的生命。經文的故事，就是教示咱怎樣起造上帝的團契，今仔日及大家作夥思考和學習，互咱信仰的生命，及信仰生活的見證，會當成為一個福氣的生命及生活。

一，有醫治，有盼望及更新活命的所在

佇新約聖經中有多多的所在，攏有仝款記載有關主耶穌基督醫治病人的故事。總是此段聖經互咱有活活的見證，教示咱按怎起造咱的信仰生命，成為主耶穌真正的學生，榮光祂的名及利益眾人。經文按呢講：「佇猶太人的一個節期，主耶穌祂來到耶路撒冷。來到ㄧ個叫羊門的所在，佇彼有一個水池，當地的人叫此個水池是~畢士大.......，逐工有多多的病人聚集佇此個所在。」

為什麼耶穌佇猶太人一個真要緊的節期內底，嘸入去聖殿內底，與猶太人的宗教領袖作夥敬拜上帝，反倒出現佇多多破病的人甲小小的畢士大水池中間？是因為畢士大此個所在是一個有醫治，會當乎人更新生命甲盼望的所在。

話說，此個水池的水，會佇ㄧ個時間上帝的使者著會甲伊攪（la）互水陣動，設使水池的水若佇震動的時，頭一個落水的人，伊身軀無論患著什麼款的症頭攏會當好。所以有多多病痛的、身軀欠安的、殘障的人，攏會想辦法欲（beh）來此個所在，佇彼等候水池的水震動時，趕快下去水池得到醫治及得到更新的生命。

畢士大水池的確是此個有醫治，互人盼望及賞賜人有更新的生命的所在，所以耶穌著出現佇彼。列位兄姊，咱所起造的家庭，社區和教會，豈是親像畢士大水池此款的所在，有醫治，互人有盼望甲賞賜人有更新的生命的所在，若是按呢，我相信，咱的救主耶穌嘛豎佇咱的中間，阿們嗎？

二、成為耶穌基督拯救的手

今仔日的聖經，是按呢給咱說，當主耶穌來到水池邊的時，伊看見多多病人躺佇彼，中間有一位破病38冬的人躺佇彼。主耶穌看見伊，就來到伊的面前講：「你愛得到好嗎？」彼個病人對主耶穌按呢應說：「主啊，水震動的時，無人通扶我落池；到我來的時，別人代先我落去啦。」

列位兄姊，畢士大是一個有醫治，有盼望甲有拯救的所在；為什麼猶原有一個破病38冬的人躺在彼沒人幫忙？咱想看麥，此段經文互咱有什麼款的教示？對我來看，這是互咱基督徒真好的信仰提醒及功課。畢士大雖然是一個有醫治，有盼望及有拯救的所在，總是咱愛知道，咱若是袂當成為耶穌基督拯救的手，咱所起造的團契，猶原親像經文所說的，破病38冬的人躺佇彼沒有幫忙，佇彼等候別人的幫忙。

列位兄姊，今仔日的社會充滿功利甲自私，條件好的人永遠會當得到閣卡多的資源甲機會，條件壞的人，永遠佇彼等候別人的幫助甲支持。這是真現實的代誌，耶穌的時代是按呢，今仔日咱的時代，嘛是按呢。上帝的團契若袂當成為耶穌基督拯救的手，咱教會的宣教事工著空空虛華無價值，嘛袂當成為別人的福氣甲盼望的記號。

三，放拺自己的舖仔來行

主耶穌就對他說：「起來，夯(gia)你的舖仔（pho-a）去行！」那個人即時好，對彼時開始，伊著脫離38年久袂當自由行動的困境。

列位兄姊，舖仔（pho-a）是乎互這破病38冬的人安心起居的所在，舖仔（pho-a）嘛是互這破病38冬的人，袂凍起立走路的物件。這破病38冬的人若無遵趟耶穌的話，夯(gia)伊的舖仔（pho-a）去行，我相信他仂猶原會佇彼躺啲，袂當領受新的生命，起來行路。

其實，咱每一個人攏有自己的舖仔（pho-a），這舖仔（pho-a）可能是咱的傳統，咱的規矩，咱的工作，咱的名聲甲社會地位，甚至是咱的價值觀，意識型態，這等等的舖仔（pho-a）的確互咱有真好的生活品質及水準。列位兄姊，此款的舖仔（pho-a）嘛可能是阻擋咱親近上帝，阻擋咱袂當成為別人福氣的物件，佇信仰生命內底親像破病38冬的人仝款，躺佇彼袂當行路。

今仔日耶穌愛咱夯(gia)咱的舖仔（pho-a）去行，咱的確愛親像破病38冬的人仝款，夯(gia)咱的舖仔（pho-a）去行，放拺咱的舖仔（pho-a）成為上帝國福音的祿用甲器具。

貳、結論

列位親愛的兄姐，今仔日主耶穌佇提醒咱：上帝的團契是要咱起造一個有醫治，會當互人更新甲盼望的生命，嘛愛咱成為主耶穌拯救的手，尋求需要咱幫忙的人，成為弱勢人的同伴及福氣；若是咱會當按呢，我相信咱嘛會當放拺咱自己的舖仔（pho-a）去行，成為上帝所歡喜的團契和教會。