05/17講道內容：回應母親的呼聲

各位兄弟姊妹，平安！

頂禮拜就是母親節。佇咱台灣的社會，有一條足有名的台語老歌，叫做《媽媽請你也保重》。歌詞是按呢唱：

「若想起故鄉，目屎就流落來，免掛意請妳放心，我的阿母。雖然是孤單一个，雖然是孤單一个。我也來到他鄉的這個省都，不過我是真勇健的，媽媽請妳也保重。」這首歌會使打動大家的心，是因為它描寫著台灣早期的社會，真濟離鄉背井的少年家，出外拍拚食苦、若是拄著失敗的時，艱苦嘛毋敢佮厝內的人講，猶有心內對家己阿母上深的掛念。

若換一个角度，位母親的眼光來看呢？一个母親佮囡仔成養大漢，看著伊離開厝，行入這個充滿挑戰佮試探、充滿好人佮歹人的社會，一位母親是會按怎感覺咧？可能那是一種驕傲、閣有煩惱、時時刻刻咧為伊的囡仔祈禱的複雜的情感。

一位母親無法度代替伊的囡仔去面對世界，伊干焦會當用伊所有的、上好的教導佮伊的愛予囡仔；然後佇背後，一直支持伊的囡仔爾爾。這種「佮予伊教育、準備、然後放手予伊去社會成長」的過程，正是母愛上偉大，也上沉重的所在。各位兄弟姊妹，恁講敢毋是按呢咧？

我會使講，我家己的媽媽就是按呢。若講到阮媽媽，伊自細漢的時陣，猶袂出世就送予人做養女，因為不是家己生的囡仔，所以養家對伊並無好。連小學都無予伊讀畢業，就叫伊開始做工作。阮媽媽伊以早有對我講，自伊細漢6、7歲仔開始，就愛佇早起3點多起床，愛煮飯、愛摒掃；而且伊破病的時陣，養父母也沒有𤆬伊去予醫生看，一直拖，時間一久，落尾伊就自小病，拖到有氣管炎和嚴重的hē-呴。無讀冊閣身體䆀的媽媽，後來，嫁予阮爸爸，阮爸爸是一个逐家所講的「外省老芋仔」。佇按呢的家庭裡，𪜶兩人對阮的期待，嘛只有「好好仔讀冊」、「後擺做一个有用的人」。伊家己嘛無讀啥物冊，這是伊家己上大的遺憾。

我會記得佇我細漢的時，伊就定定對我講，「媽媽就是因為無讀冊，所以足濟代誌攏毋捌。」伊因為身體䆀，所以無法度出去上班，毋過阮媽媽為著愛予阮遮的囡仔讀冊，嘛猶原拍拚做家庭代工，賺淡薄仔錢，來補貼一寡費用，一直到我到台北讀博士班的時陣，伊離開世上為止。所以我一直真感謝我的媽媽。

各位兄弟姊妹，佇聖經的福音書裡面，咱碼會使看見母愛的表現。彼就是耶穌的母親馬利亞，一位行向十字架跤的母親。佇路加福音中，耶穌還是一个囡仔、予人𤆬到聖殿的時，老先知 西面 佮馬利亞一个予人真痛苦的預言。伊講：「這個嬰仔受選立是欲以色列中真多人跋倒，真多人𬦰（ peh）起來，閣成做受攻擊的記號，...」續接，西面越過頭來，對馬利亞講了一句無比沉重的話：「你本身的心嘛會互利劍（ lāi-kiàm）鑿迵過(chha̍k thàng--kè）。」 (路加福音 2:34-35)

後來這個預言應驗囉。耶穌被人釘在十字架上，門徒攏走去啊，毋過伊的母親並無離開，猶原站在那裡，(約翰福音 19章25節說：「徛佇耶穌的十字架邊仔，有耶穌的老母...」。

各位弟兄姊妹，咱做夥來想彼個畫面：一位母親，看著伊家己懷胎十個月、成養大漢的囡仔，去予人打甲歸身軀mi-mi-màu- màu，掛佇咧十字架頂、為大家犧牲性命，是按怎的心情？伊無法度代替耶穌受苦，嘛袂當予伊一杯茶啉lim。

馬利亞佇遮，表現出信仰中間上深的「共受苦難」。她毋但知影她的後生，佇咧完成上帝救贖世界的偉大計畫，伊嘛知影耶穌必須愛行這條十字架的路。

馬利亞的母愛，昇華成做一種神聖的「放手」；伊流著目屎，看著她的後生為著這個世界，將家己完全犧牲。這是何等偉大的母愛呢！

玉山神學院——孕育īn-io̍k時代牧者的屬靈母親

各位兄弟姊妹，為什麼咱今仔日愛佇遮，討論這份沉重的母愛？因為這就干焦是「玉山神學院」佇上帝國中所扮演的角色。在拉丁文當中，咱稱呼咱畢業的母校是 Alma Mater，Alma Mater的意思是「慈愛的母親」。咱若說教會是神的厝，神學院就是培養未來教會牧者的「慈愛的母親」。

神學院的教育，毋但是知識的學習，嘛是一个培養「生命」的過程。就像母親用家己的身體成養囡仔仝款，神學院用上帝的道，用濟濟老師的祈禱、用嚴格的學問，佇一位神學生的生命裡進行雕刻、佮基督的十字架，刻佇在未來的傳道者的心中。

神學生畢業、派到教會的時陣，神學院的心情，就敢若十字架邊仔的馬利亞仝款。神學院知影，這个少年傳道者欲面對一个充滿挑戰的時代，因為這馬有真濟偏鄉的教會，完全沒有傳道者，所以，有真濟傳道者一個人愛牧養兩、三間教會。三間教會攏足遠的，早起先佇一間教會主持禮拜，下晡閣開車去另外兩間教會。有的傳道者所提著的謝禮，猶無法度維持伊的生活所費。

就佇按呢的情形之下，𪜶愛面對資本主義社會中對信仰的失落、愛面對教會世俗化的試探、也有可能必須為著堅持公義佮真理，來面對攻擊佮誤解。

神學院這位屬靈的母親知影，伊培養出來的囡仔，是欲去行十字架道路的。神學院這位母親，無法度代替傳道者徛佇第一線，也無法度代替傳道者來擔牧會的重擔，毋過她會當相信：佇遮的囡仔欲出發進前，神學院已經予𪜶上清氣的、上堅強的真理裝備，予𪜶佇面對魔鬼試探的時，會當徛會在。不過，這位成養濟濟傳道者的母親，神學院本身，今也需要咱的照顧。

玉山神學院佇花蓮，為著提供上好的師資、維持圖書館的資源、設立獎學金予散食的，紲有呼召的學生，予𪜶會使繼續讀冊，伊承擔著真大的壓力。因為玉山神學院的經費，完全倚靠每一間教會、每一位兄弟姊妹的奉獻佮支持。

各位弟兄姊妹，今咱會當坐佇遮，領受正確的真理教導、享受牧者的關懷，是因為真濟年來，神學院這位母親付出了極大的代價，培養了咱濟濟的牧者。佇母親節期的這个時陣，除了拍通一電話，予咱的母親請安以外，也懇求大家，來記念咱的屬靈母親。予咱用實質的奉獻，成做玉山神學院的支持。予這位母親毋免為著資源無夠來擔心，讓伊會當繼續為這个時代、為後一代的台灣教會，培養出閣較濟，願意行向十字架、改變世界的忠心奴僕。願上帝感動咱的心，也願主賜福予玉山神學院佮咱在座的每一位兄弟姊妹。